دهوک

ژ گوندەکی دور…دور…دور

ب قاسی نزیک بوونا تە ژ من دور

باژێرۆ

ئو ب قاسی دوربونێ بخوە،

من سلاڤ کر بوو رۆیبارێ تە

لگەل پێلێن بایێ گارەی

ئو لگەل ئاوازێن لاوکێ مەتینیێ

                      

تۆ وی چاخی

سترانبێژەکێ شێت و سەوداسەر بووی

ئاواز لسەر لێڤێن تە کویڤی نەدبوون

کەرب و کین تە ناس نەدکرن

مینا زارۆکەکێ ساڤا

 تە ئەز هەمبێز دکرم

 

*       *       *

ژ گوندەکی دور…دور…دور

دەما ئەز هاتیم ڤی باژێری،

دبەر من دا بوون                

کراسەکی پاتەکری

سۆلەکە دریای

ئو دگەل من دابوو

چانتەکە ریسی

تێدا دەفتەرەک ژ حەرفێن هۆر

پەرتوکەک ژ برینێن کۆر

برینا دارێ مامۆستای

نەخشێ ناڤا دەستێن من بوو

رەڤەک ژ ترسا دزێن شەڤێ

جوانیەک ژ ئەشقا زارۆکیێ

سیمایێ من پێچا بوو

ئو تۆ ژی

تۆ ژی ..هیڤیەک بێ چەنگ هشت بووی

لسەر سینگێ تە، تالانکر بوون، خەونێن رەنگین و مۆر

جەردەڤانێن پەیڤکوژ

دێوێن خوە دناڤ رێزێن ئەنفالاندا ڤەشارتین

ئو بنەفشوکێن حەودا ڤیانا تە

 بێ بنکرین                                

لهنداڤی بلندیا رومەتا تە، چەرخ ڤەددان                                   

ب ددانێن پیرهەڤیان دگەستن ، نازدارێن تە

دگەستن ئەو سێڤەسور

 

*       *       *

ژ گوندەکی دور…دور…دور

دەما ئەز هاتیم ڤی باژێری

 کالێن بتەنێ مایین هەبوون

یێن ب قەلۆین و باسکان رە بوینە هەڤال

ئو لگەل تزبیێن خاپینوک و..

ئاراما سنورکری د پەیڤیین

کالێن هەژاریێ سیمایێ وان کێلای

داستانێن قرمچۆک و شکەستێن..

خوە لسەر رۆیان کرینە تابلۆ

هەر تابلۆیەکی

هەر شکەستەکێ

دیروکەکە تەحل و بێ داوی

د ناڤ روپەلێن خوە دا ڤەشارت بوون

ئو لسەر لێڤێن هشک

نم نما لاوک و حەیرانێن ژبیرکری هەبوون

دیسان لبەندا مە بوون

داپیرێن گلولکێن ریسێ وان ئالزی و

قودیکێن برنۆیتا تۆژ، دبەر شالان را

داپیرێن بیناهیا وان ئەو قاس لاواز

کو نکاربوون ژ دەرازینکێ ببورن

مەشا وان بویە چوار گاڤ و…بێهنڤەدانەک

هیڤیا وان بویە

روژەک بێ

مزگینیا ڤەگەرا بەردلک و..

نازدارێن چوینە رێکا چون و نەهاتێ ببهیزن

_ ئاخ ژبو گوندێ منی دۆر

_ ژبو باژێرێ منی دۆر

_ ژبو کیشوەرێ منی دۆر

_ ژیو جیهانا منا دۆر

_ ژبو هەردوو دەستێن من، یێن ژهەڤ دۆر

کو نکارن یەکبگرن

_ ژبو تبلێن دەستێ ژ هەڤدۆر

کو نکارن قەلەمی بگرن و..

شیرەتا منا داویێ بنڤێسن

کو نکارن قەلەمی بگرن و ..

وەسیەتا منا داویێ بنڤێسن

 

*       *       *

 

هەڤالنۆ دەما من من دخوەست

ژ ڤی باژێرێ دۆر نزیک ببم

هەلبەستا هەڤالەکێ شەهید

مێهڤانا دیوانا من بوو

شوپا سۆلێن سوارەکێ عەگید

لبەر دەرازینکا من بوو

ئو سیا کەزیێن فریشتەکا دەریایی

لهنداڤی سەرێ من بوو

بێهنا جلێن سالۆیێ دین،

خوەشتر ژ بێهنا لورێیالان

لبەر دفنا من بوو

رئیس معروفی ژی، بەیانێن لەشکری ددان و..

ب ئیمزا بابێ فەخرۆ..فەرمان بەلاف دکرن

وی چاخی دناڤبەرا دوو هەلبژارتناندا

ئەز حەیری مابووم

_ دارێ تڤەنگێ، یان دارێ زەیتونێ؟

_ دەستکێ خەنجەرێ، یان قەلەم؟

_ ئاگر، یان پەیڤێن شرین؟

_ کین، یان حەژێکرن؟

_ دوری تە، یان غەریبی د جرگێ تە دا؟

دوری تە

_ ئاخ باژێرۆ

_ ئاخ هەڤالۆ

دوری تە

چەند زورە دوری تە!!

ژ مرنێ، تڤەنگێ..و کین و دلرەقیێ،

ئو غەریبیا د جەرگێ تە دا، من حەز نەکربوو

لەوان ئه‌ڤرو..

 لژێر سیا دارا زەیتونێ

بویمە هەلامەتێ دوریێ

ئو دوری تە

دسەر کیشوەران رە، د پشت کیشوەران رە

تە هەمبێز دکەم

 

*       *       *

 

باژێرۆ..

هەڤالۆ..

گەر هۆن بخوازن

گوهداریا هەلبەستەکا من بکەن

هەرن شکەفتا هەلامەتان

ل ور پەیڤێن من هێژی دەنگ ڤەددەن و..

زێمارا خوە بداوی نەکریە

گەر هۆن بخوازن، پێلێن کەنیێ من ببهیزن

هەرن گەڤەرکێ

لگەل دەنگێ گوللەیێن سوارێن شەڤێ

یێ لسەر جەندەکێ دێوێ رەش سەمایێ دکەن

گەر هۆن بخوازن پێلێن گریێ من ببهیزن

سوبەیا سەرهلدانێ

هەرن گورستانێ

لژێر کێلیێن پیرۆز

یێن خالد کوچەری و ماجد ئوره‌یی و..قادرێ مەجلمەختی

بوینە فریشتەیێن ئازادیێ و ..

نڤێژا نۆژیان و زیندیبوونێ دکەن

گەر هۆن بیریا من نەکەن

من بیریا وە کریە

ڤایە پەیڤێن هەلبەستا من

پەرچەیێن گیانێ من

ژ وە رە دبن سلاڤ، هۆن ژی

هۆن ژی..

ببن زێرەڤان، دا دزێن شەڤێ

خەونێن ڤی باژێری هەو تالان بکەن

ببن ئاڤێن زەلال، دا ماسگرێن ئاڤا شێلی

نکارن نێچیرێ بکەن

ببن شەمالک، دا تاری جاردن

ڤی باژێری داگیر نەکەت

ببن پەیڤێن ژ ئاگری و ..

کەڤرێن خوەرستی

دا کەلییا شەدا و فەرعینی

هەر سەربلند بمینن!!

_ ئاخ ژبو گوندێ منی دور..دور..دور

_ ژبو باژێرێ منی دور

_ ژبو جیهانا منا دور

_ ژبو دەستێ تبلێن وی ژهەڤدور

کو نکارن سلاڤا داویێ بەرسڤ بدەن و..

شیرەتا منا داویێ بنڤێسن!!

وەسیەتا منا داویێ بنڤێسن!!

نجیب بلایی                                

بەرلین 2002 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s